Bloga

MARTXOAN MUSIKA, DANTZA ETA MIHILUZE LEHIAKETAK BILBOROCK-EN HARRAPAZANK PROGRAMAREN ESKUTIK

• Martxoan musika kontzertuak, dantza lehiaketaren gala  eta Mihiluze saio berezian parte hartzeko aukera izango da.
• Gero eta gazte gehiagok parte hartzen dute ekimenetan. Alde biko komunikazio etengabea.
• Dantzazank Gala eta Mihiluzera publiko bezala joateko gonbidapenak egun berean Bilborock-en dohainik  eskuragai.

Bilboko Udalaren Euskara Sailak nerabeei zuzenduriko Harrapazank programa jadanik martxan da. Azken asteotan musikagintza jorratu duten Jozank Topaketa interesgarriez gain, aurten bada non aukeratu. Kauta eta Suganen lan berriak zuzenean ezagutu, bilbotar gazteen koreografiak Dantzazank Galan ikus-entzun zein bilbotarren artean ospatuko den Mihiluze saio berezian parte hartzeko aukera izango da.  Gazte bilbotarren nahietara sorturiko eta beraien talde lanak garatutako aisialdi eskaintza anitza herritar guztion eskura.

Musika, dantza eta Mihiluze lehiaketa berezia izango dira Harrapazank programak martxoan zehar  ospatuko dituen ikuskizunen ardatz nagusiak. Horretarako teknologia berriek zein aurrez aurreko komunikazioak eskaintzen dituen baliabideak erabiltzen dira. Horren adibide dira Harrapazanken inguruan sortu diren sare sozialek zein blogak jaso izan dituen bisitarien sarrerak. Harrapazankeko Tuenti sareak esaterako 3000 bisita eta ehundaka mezu jaso izan ditu azken hilabetean.

KAUTA ETA SUGAN

Gazteei zuzenduriko musikan erreferente bihurtu diren Kauta eta Sugan taldeak, Isladak eta Malko Gorria deituriko lan berriak aurkeztera datoz.  Bilborock aretoa argi eta doinuz jantziko da, talde gazte hauen ikuskizun berriei ongi etorria emateko.  Hitzordua martxoaren 13an, ostirala, 20:00etan izango da. Sarrerak jadanik Bilborock-en zein BBKren orotariko kutxazainetan  6€-tan daude salgai.

DANTZAZANK

Ekimen arrakastatsua izan da, 20 bat taldek adierazi baitute lehiatzeko grina. Otsailak 17an ospatu zen kasting-era begira, taldeek koreografia ikusgarriak landu zituzten, Galan plaza bat eskuratzeko asmoz zein gogoz.  Zaila izan zen arren, epaileen erabakiak 6 talde aukeratu zituen. Ordutik, asteartero koreografo baten laguntzarekin beraiek sorturiko koreografiak fintzen dabiltza.  Publikoa liluratuko duen dantza lehiaketaren prestaketa lanak abian dira. Martxoaren 20an ospatuko den galan ikusle bezala joan nahi izanez gero, egunean bertan 18:30etatik aurrera, Bilborock-era hurbiltzen diren pertsonen artean gonbidapenak banatuko dira. Lehiaketa bera 19:30etan hasiko da, dantzariak epaimahaikideen oniritzia eskuratzen ahaleginduko direlarik sariak irabazteko helburuarekin (ikasbidaiarako dirulaguntza edo multiabentura asteburua 6 laguntzat esaterako). Bilbotarren talentua taula gainean Nerea Alias aurkezlearen eskutik.

MIHILUZE

Telebistako saio arrakastatsuak Bilborock aretoa plato bihurtuko du martxoaren 27an. Arratsaldeko 19:30etatik aurrera, Ilaski Serrano eta Kike Amonarrizek gazte bilbotarren lehia gidatuko dute. Bitartean, partaideak famatuen laguntzarekin jokoan dauden sariak irabazten ahaleginduko dira (multiabentura egun pasa 6 laguntzat, MP3ak…). Artista gonbidatuak Urko Aristi, Onintza Enbeita, Joseba Olagarai, Yannick Vergara, Jokin Lacalle eta… Publiko gisa etorri nahi duenak, ikuskizuna ospatuko den egunean gonbidapenak jaso ahalko ditu Bilborock-en 18:30etatik aurrera.

Informazio gehiago nahi izanez gero:

663083736 edota harrapazank@gmail.com