Gose taldeko Ines Osinaga, Lor taldeko Lander Irazola eta Seiren taldeko Onintze Garcia izan ziren atzo Jozank ekimenari hasiera eman zioten hiru musikariak. Bilboko Udalak antolatzen duen Harrapazank programaren barruan eskainitako doako musika ikastaroak dira eta aste honetan zehar Bilborocken izango dira musikaren alor ezberdinak lantzeko.

Bideo, zuzeneko eta sariak

Dena ez zen hala ere berriketa izan eta zuzeneko kantuak eta bideoklipak ikusteko parada ere izan zen. Disko eta opariak ere banatu ziren bukaeran.

Garciak, bi balada aukeratu zituen akustikoan kantatzeko. Osinagak, aldiz, trikitiarekin bere herriko «punki zahar batzuek» abesten zuten «Enamorado de la muerte»ren bertsio berezi bat. Sorkuntza aitzakiatzat hartuta, kantu gehienak lau akorderekin osa daitezkeela demostratzeko «pot-pourri» bat osatu zuen Irazolak, irrati gehienetan entzuten diren greatest hits-ekin.

Entzuleen galderen txanda iritsita, «kantu on bat» sortzeko formulaz galdetu zieten hiru musikariei. «Edukiko banu, ez nuke hain erraz botako», izan zen Osinagaren erantzuna. Arrakasta lortzeko garaian, marketinak laguntzen duela aitortu zuen Irazolak, baina «kantuak ez badu ezer, diruak ez du ezertarako balio».

Onak edo ez hain onak, betiko lau akordeekin edo beste batzuekin, hiru musikariek kantuak egiten jarraitzeko duten grina agerian geratu zen. Osinagak azaldu zuenez, «kontatzeko gauzak dauden bitartean, kantuak egiten jarraituko dugu».